Հայկական Կարմիր խաչը և «Գալաքսի» ընկերությունների խումբը կհամատեղեն ջանքերը հանուն Արցախի հայրենակիցների. 100 տոննա հումանիտար օգնություն կհատկացվի ընտանիքներին

Միասնական և հոգատար. Հայաստանի խոշոր ձեռնարկություններից «Գալաքսի» ընկերությունների խումբը Հայկական Կարմիր խաչի ընկերության հետ համատեղ նախաձեռնում է կորպորատիվ ոլորտի համայնքային մարդասիրական նախաձեռնություն՝ ուղղված Արցախից բռնի տեղահանված հայրենակիցների   աջակցությանը: Այս մասով հոկտեմբերի 11-ին Հայկական Կարմիր խաչի ընկերության (ՀԿԽԸ) գլխավոր գրասենյակում Հայկական Կարմիր խաչի ընկերության և «Գալաքսի»  ընկերությունների խմբի միջև կնքվեց փոխըմբռնման հուշագիր:

Հուշագիրը ստորագրեցին Հայկական Կարմիր խաչի ընկերության գործադիր տնօրեն Աննա Եղիազարյանը և «Գալաքսի» ընկերությունների խմբի համահիմնադիր և  գլխավոր տնօրեն Արամ Խաչատրյանը` հավատով, որ հոգատարությունն ու պատասխանատվությունը կենսական են մեր հայրենակիցների համար:

«Արցախից բռնի տեղահանված մեր հայրենակիցների խնդիրները որոշակի չափով մեղմելու հարցում բոլորս միասնական ենք և պատրաստակամ: Այս իմաստով մեծապես կարևորում եմ մեր համագործակցությունը Հայկական Կարմիր խաչի հետ, որն այս օրերին իրականացրել է տիտանական աշխատանք: «Գալաքսի» ընկերությունների խումբը` խմբի կազմում հանդես եկող ընկերությունների և նրանց աշխատակիցների հետ համատեղ ուժերով, նույնպես միանում է իրականացվող մարդասիրական աշխատանքին: Սա ոչ թե ընկերությունների, այլ իր ընկերություններով հանդերձ «Գալաքսի» համայնքի աջակցությունն է՝ գաղափարական, ապա նաև մարդասիրական»,-ասել է «Գալաքսի» ընկերությունների խմբի համահիմնադիր և գլխավոր տնօրեն Արամ Խաչատրյանը:

Նախաձեռնության շրջանակում Արցախի Հանրապետությունից բռնի տեղահանված 5,000 ընտանիքներ կստանան 100 տոննա պարենային ապրանքներ` պարենային փաթեթների տեսքով ամենօրյա կարիքների և ձմռանը դիմակայելու համար: Փաթեթները կկազմվեն լավագույն ապրանքների, արժանավայել փաթեթավորման և ներկայացման սկզբունքով, որի համար Հայկական Կարմիր խաչին կմիանա նաև խմբի անդամ ընկերություններից շուրջ 300 կամավոր աշխատակից:

Նախաձեռնությունն իրականացվում է  «Գալաքսի» ընկերությունների խմբում հանդես եկող «Այ Յու Նեթվորքս», «Խրոնոգրաֆ», «Գեյթ2», «Մեգաֆուդ»,  «Փոլ Հայաստան», «Սանտաֆե», «Տերյան5», «Թայմ», «Յուքոմ», «Երևան մոլ»  ընկերությունների հետ միասին՝ հիմնադիրների զգալի ֆինանսական աջակցությամբ: Նախաձեռնության կազմակերպչական աշխատանքները իրականացվելու են խմբի «ԱքսելՄոնդրիան և գործընկերներ» ընկերության կողմից, իսկ շահառուների ընտրության և փաթեթների բաշխման ողջ ընթացակարգը կազմակերպվելու է Հայկական Կարմիր խաչի կողմից:

«Մենք ողջունում ենք և բարձր ենք գնահատում կորպորատիվ հատվածի կողմից սոցիալական պատասխանատվություն դրսևորելու քայլերը՝ ուղղված խոցելի խմբերի մարդասիրական հոգսերի հնարավորինս թեթևացմանը։ Վստահ եմ, որ նման օրինակելի՝ համապարփակ, բազմակողմանի և շարունակական համագործակցությունը մարդասիրական կազմակերպության և բիզնես ընկերությունների խմբի միջև, մարդասիրական աջակցության տրամադրման և համայնքների դիմակայունության բարձրացման արդյունավետ ձևաչափ է»,- նշել է Հայկական Կարմիր խաչի ընկերության գործադիր տնօրեն Աննա Եղիազարյանը:

Համագործակցության մեկնարկն ու ձմռան պատրաստությունները սկսել են արդեն, իսկ բաշխումն ըստ մարզերի կմեկնարկի հոկտեմբերի կեսերից: Կողմերը թափանցիկության և հաշվետվողականության պարբերական զեկույցներ կներկայացնեն հանրությանը:

###

«Գալաքսի» ընկերությունների խումբը, հիմնադրված Արամ Խաչատրյանի, Գուրգեն Խաչատրյանի և Արտյոմ Խաչատրյանի կողմից, հայկական հոլդինգային ընկերություն է, որը ներկայացնում է 15 ընկերություն 3 երկրում։ Ընկերությունը ջանքեր ու միջոցներ է ուղղում Հայաստանում սոցիալական պատասխանատվության ծրագրերի իրականացմանը կրթության, սոցիալական զարգացման և արվեստի ոլորտներում Հայաստանում մտքի առաջնորդության և մտավոր կապիտալի զարգացման համար։ Միայն վերջին տարիներին «Գալաքսին» իրականացրել է 64 խոշոր մասշտաբային ԿՍՊ նախագծեր, որի ուղիղ շահառուներ են դարձել 10,000-ից ավելի մարդիկ։

Հայկական կարմիր խաչի ընկերությունը (ՀԿԽԸ), լինելով Կարմիր խաչի և Կարմիր մահիկի միջազգային շարժման լիիրավ անդամ, առաջնորդվում է Շարժման հիմնարար սկզբունքներով` Մարդասիրություն, Անկողմնակալություն, Չեզոքություն, Անկախություն, Կամավորություն, Եզակիություն, Համընդհանրություն։ Հանդիսանալով կառավարությանն աջակցող կառույց՝ մարդասիրական ոլորտում, ՀԿԽԸ-ն արդեն 103 տարի է գործունեություն է ծավալում հանրապետության ամբողջ տարածքում հետևյալ ռազմավարական ուղղություններով՝ աղետների կառավարում, բնակչության տեղաշարժ, սոցիալ – առողջապահություն, առաջին օգնություն, երիտասարդների հիմնախնդիրներին արձագանք, մարդասիրական արժեքների տարածում և այլն: ՀԿԽԸ առաքելությունն է նվազեցնել բնակչության խոցելիությունը` մարդասիրության ուժի մոբիլիզացմամբ, նախապատրաստվել դիմակայելու այն իրավիճակներին, որոնք կարող են բնակչության խոցելիության պատճառ դառնալ, ցուցաբերել անհրաժեշտ օգնություն` սատարելով սոցիալ-տնտեսական ծանր պայմաններում գտնվող մարդկանց:

Պաշտոնական Հաղորդագրություններ
5G-ի անցմանը պատրաստ ցանց և որակապես նոր հեռուստատեսություն. Ucom-ը, Nokia և Mediakind ընկերությունների հետ կնքել է պաշտոնական համաձայնագրեր
Ucom-ը հայտարարում է ցանցի արդիականացման նոր փուլի մեկնարկի մասին, որի շրջանակում Երևանում պաշտոնական համաձայ ...
12 Փետրվարի, 2024
ԱՎԵԼԻՆ
«Գալաքսի» ընկերությունների խումբն ու Եվրոպական բիզնես ասոցացիան Հայաստանում հյուրընկալել են հավատարմագրված դեսպանների և բիզնես առաջնորդների ամենախոշոր միջոցառումը
Հայաստանում հավատարմագրված ավելի քան մեկ տասնյակ դիվանագետներ և գործարար համայնքի շուրջ 50 ներկայացուցիչներ ...
31 Հունվարի, 2024
ԱՎԵԼԻՆ
Արցախից բռնի տեղահանված շուրջ 5000 ընտանիք «Գալաքսի» ընկերությունների խմբի կողմից ստացել է 100 տոննա օգնություն
«Միասնական և հոգատար». այս խոսքերը միավորել են «Գալաքսի» ընկերությունների խմբի աշխատակիցներին, որոնք ավելի ...
22 Հունվարի, 2024
ԱՎԵԼԻՆ